Árangur af áfengis- og vímuefnameðferð er margbreytilegur og mismunandi.

Sjúkrahúsið Vogur: Markmið sjúkrahússins er að afeitra fólk og greina. Árangurinn verður þá metinn út frá því hversu margir ljúka afeitrun og hversu margir útskrifast í samráði við starfsfólk og fara í þau meðferðarúrræði sem þeim er ráðlagt.

Markmið með endurhæfingarmeðferð á Staðarfelli, Vík og á göngudeild, er að sjúklingar hætti allri vímuefnaneyslu og nái líkamlegri heilsu, geðheilsu og félagslegri endurhæfingu.  Á byrjunarárum SÁÁ voru gerðar athuganir á árangri eftir meðferð og í ljós kom að um helmingur sjúklinga sem lauk meðferð á Staðarfelli og að Sogni fyrir 1984 náðu að vera frá áfengi í 2 ár.  Í þessum athugunum var gert ráð fyrir að allir þeir sem ekki náðist til hefðu byrjað vímuefnaneyslu. Athugun var gerð á þeim sjúklingum sem leituðu sér meðferðar í 1. skipti á Vogi 1984 og kom í ljós að væru sjúklingar 25 ára eða eldri og lykju fullri endurhæfingarmeðferð náði rúmlega 60% þeirra að vera frá áfengi í 2 ár.  Við þessa athugun var einnig gert ráð fyrir að þeir sem ekki náðist í væru í neyslu. Árið 1986 var gerð athugun á árangri þeirra sem höfðu lokið einu fullri áfengismeðferð og í ljós kom að um 30% þeirra náði að vera frá vímuefnum í 2 ár. Tvívegis síðan hafa verið gerðar athuganir á árangri endurhæfingarmeðferðar hjá þeim sem farið hafa í Víkingameðferð.  Flestir þeirra hafa langa meðferðarsögu og hafa að meðaltali verið 4.5 sinnum áður í fullri áfengismeðferð.  Í ljós kom að um 20% þessara sjúklinga náðu að vera frá vímuefnum í heilt ár.  Hópurinn sem náði árangri borin saman við hin 75% sem ekki náðu þessum árangri var að meðaltali eldri og hafði verið oftar í meðferðum.  Bendir þetta til þess þó að batahorfur séu litlar næst árangur með tímanum og endurteknum meðferðum.
 
Það er mjög vandasamt að meta árangur áfengis- og vímuefnameðferðar sem miðar að bindindi og félagslegri færni og ekki sanngjarnt að nota einungis mælikvarðann um vímuefnaneyslu til að meta árangurinn. SÁÁ hefur því hafið samvinnuverkefni með ASAM ( American Society of Addiction Medicine ) til að gera með þeim árangurskannanir á mismunandi meðferðarúrræðum. Við mat á árangri verður litið til ýmissa þátta eins og vímuefnaneyslu, hversu oft menn þurfa að nota heilbrigðisþjónustu, metin er geðheilsa þeirra og félagsleg færni og staða.  Þetta samvinnuverkefni er nú komið á fót og vonandi verður hægt að gera mat á árangri meðferðarinnar í þessu alþjóðlega samvinnuverkefni innan fárra ára.