Valmynd
english

14,6% karla á sextugsaldri eiga að baki meðferð hjá SÁÁ

7,6% af öllum núlifandi Íslendingum, 15 ára og eldri, höfðu komið í meðferð til SÁÁ í árslok 2014, 10,6% allra karla en 4,5% allra kvenna 15 ára og eldri.

Þegar aldurshópar eru skoðaðir sést að 14,6% núlifandi karlmanna á aldrinum 50-59 ára hafa komið í meðferð til SÁÁ en 14,1% karla 60-69 ára.

Hjá konum hafa hlutfallslega flestar komið úr aldurshópnum 60-69 ára, 6,1%, en 6,0% á aldrinum 50-59 ára.

Nánari upplýsingar er hægt að sjá með því að smella á myndirnar hér að ofan.

Alls höfðu 23.580 einstaklingar leitað meðferðar hjá SÁÁ í árslok 2014 en samtökin tóku til starfa síðla árs 1977. Af þessum 23.580 hafa 11.684 eða 49,4% komið einu sinni. 18.350, eða 77,8% alls hópsins,  hafa komið þrisvar sinnum eða sjaldnar.

Hins vegar hafa 699 núlifandi Íslendingar, 501 karl en 198 konur, komið oftar en 10 sinnum til meðferðar en það eru 3% alls sjúklingahópsins. 199 einstaklingar úr þessum hópi endurkomufólks komu á Vog árið 2014, 139 karlar en 60 konur.

Á árinu 2014 komu 1.552 einstaklingar í afeitrun á Vogi, 1.060 karlar en 492 konur. Innlagnir voru alls 1.997.  576 einstaklingar komu í fyrsta skipti á Vog á árinu 2014 .