Valmynd
english

Álfasölukóngur ársins!

Salan á álfi SÁÁ gekk vel eins og undanfarin ár, þrátt fyrir mikla rigningu í álfasöluvikunni. Yfir þúsund manns unnu við álfasöluna um land allt en álfasölukóngur ársins er Kristján Valsson, sem fékk afhentan Ofur-Álf 2018 í viðurkenningarskyni.

Kristján Valsson er álfasölukóngur 2018. Formaður SÁÁ, Arnþór Jónsson, afhenti honum Ofur-Álf í viðurkenningarskyni!

„Landsmenn tóku álfinum vel og við erum mjög þakklát fyrir stuðninginn,“ segir Arnþór Jónsson, formaður SÁÁ. „Þjóðin hefur sameinast um að kaupa álfinn í 29 ár og þannig hefur okkur tekist að byggja upp samfellda og heildstæða heilbrigðisþjónustu um forvarnir, afeitrun, eftirmeðferð, göngudeildir, búsetuúrræði og félagsstarf sem tugþúsundir hafa nýtt sér til góðs.“

Álfasalan er mikilvægasta fjáröflunarleið samtakanna og hafa tekjurnar af henni skipt sköpum í þjónustu við ungt fólk. Sem dæmi um það sem gert hefur verið fyrir andvirði álfasölunnar má nefna uppbyggingu ungmennadeildarinnar við Sjúkrahúsið Vog og einnig hefur SÁÁ getað boðið börnum, sem eru aðstandendur fólks með fíknsjúkdóm, upp á sálfræðimeðferð. Alls hafa um 1300 börn fengið 8 sálfræðiviðtöl hvert, í boði álfasölunnar síðustu 11 ár.