Valmynd
english

Allir þurfa bakland

Þegar ég kom úr meðferð fyrir u.þ.b. tveimur og hálfu ári síðan leið mér ekki vel. Mér fannst ég vera búinn að tapa í lífinu. Alkóhólisti með þrjár meðferðir að baki á sama árinu. Ég upplifði mikið vonleysi, fannst ég vera einn og yfirgefinn og framtíðin leit ekki vel út.

Að eiga bakland

En þegar ég fór af stað út í lífið fann ég strax að allt þetta var rangt. Ég átti mína menntun, hafði enn mína hæfileika og það sem mestu skipti, ég átti frábæra fjölskyldu, vini og vinnufélaga sem stóðu við bakið á mér. Ég átti öflugt bakland sem átti mjög stóran þátt í mínum bata. Það gerði það að verkum að ég þurfti aldrei að vera einn í mínum þjáningum. Ég átti alltaf einhvern að. Það var og er mér ótrúlega dýrmætt.

En sumir eiga ekkert bakland. Þeir koma úr meðferð og fá enga aðstoð. Einu vinirnir eru gömlu neyslufélagarnir. Engin fjölskylda er til staðar, engin menntun, ekkert öryggisnet. Þess vegna er ekkert skrýtið að þetta fólk fari aftur út í neyslu. Því finnst ekkert annað vera í boði.

Við eigum að hjálpa

En það þarf ekki að vera þannig. Við, Íslendingar, eigum að hjálpa þessu fólki, veita þeim það bakland sem það skortir. Mikið af þessu fólki hefur aldrei fengið neinn stuðning. Ekki einu sinni í æsku. Sumir áttu fárveika foreldra í vímuefnaneyslu. Þeim gekk kannski illa í skóla, var hafnað félagslega og fóru fljótlega sjálfir að leita skjóls í fíkniefnum. Margt af þessu fólki fer svo út í glæpi og endar í fangelsi. Þar fer það svo jafnvel í ennþá meiri neyslu og er inn og útúr fangelsum árum saman.

Af hverju veitum við þessu fólki ekki þá hjálp sem það þarf og á skilið? Þetta fólk eru sjúklingar sem þurfa læknishjálp. Og í þeirra tilviki dugar ekki venjuleg meðferð. Þess vegna þarf að efla úrræðin, lengja sjúkravist og eftirfylgni með þessu fólki. Við hjá SÁÁ eru reiðubúin með þannig úrræði, úrræði sem ganga út á að tryggja þessu fólki bakland. Við viljum leyfa því að vera lengur inni í meðferð og að henni lokinni viljum við hjálpa þeim af stað út í þjóðfélagið. Við viljum nota 37 ára reynslu samtakanna og veita þeim baklandið sem það aldrei hafði. Baklandið sem átti svo stóran þátt í að hjálpa mér og fjölmörgum öðrum að ná bata við sjúkdómnum alkóhólisma.

Treystum baklandið

Miðvikudaginn 8. október nk. hefst formlega söfnun SÁÁ sem ber yfirskriftina: Treystum baklandið. Við höfum nú þegar sent valgreiðsluseðla á fjölmörg fyrirtæki og viðtökurnar eru vægast sagt frábærar. Almenningi gefst kostur á að taka þátt í símasöfnun þar sem fólk hringir í símanúmer og styrkir þar með starf SÁÁ í þessum málaflokki.

Ég vil af öllu hjarta hvetja alla sem vettlingi geta valdið að aðstoða okkur við þetta mikilvæga og aðkallandi verkefni.

Hringið í síma 903-1001 fyrir 1000 króna stuðning, 903-1003 fyrir 3000 króna stuðning og 903-1005 fyrir 5000 króna stuðning.


Grein Rúnars birtist fyrst í Fréttablaðinu 8. október 2014, sama dag og baráttufundur SÁÁ fór fram í Háskólabíói undir kjörorðinu Treystum baklandið.