Valmynd
english

Treystum baklandið – Landsöfnun SÁÁ

Söfnunin snýst um að koma á fót langtímameðferðarúrræði fyrir endurkomusjúklinga – karla og konur sem eru langt gengnir áfengis- og vímuefnasjúklingar og þurfa meiri þjónustu að lokinni afeitrun en hægt er að veita með núverandi meðferð.

Léleg félagsleg staða og færni fólksins ásamt með lélegri líkamlegri og andlegri heilsu gerir núverandi meðferð of hraða og átakamikla. Þörf er á sérúrræðum fyrir þetta fólk. Langflest eru þau eldri en 35 ára og farin að láta á sjá vegna áratuga langrar óhóflegrar áfengis- og vímuefnaneyslu. Líkamleg heilsa er yfirleitt léleg. Flest búa ein, taka lítinn þátt í fjölskyldulífi og eru áberandi félagslega einangruð. 80% þeirra hafa ekki verið í vinnu árum saman. Stöðugur húsnæðisvandi plagar fólkið og mörg eru á götunni.

Stuðningur við langtímameðferð fyrir konur og karla

SÁÁ telur að sérhannað búsetuúrræði með einstaklingsíbúðum fyrir allt að 36 karla og konur úr þessum hópi geti leyst stóran hluta vandans til frambúðar. Samtökin vilja búa þessu fólki slíkt heimili með langtíma félagslegum stuðningi og nauðsynlegri heilbrigðisþjónustu. Vera þessu fólki það bakland sem það ekki hefur í dag.

Það er slíkt umhverfi sem er forsenda fyrir því að svo langt gengnir alkóhólistar geti náð langtímaedrúmennsku. Þessu úrræði þarf að koma á fót svo hægt sé að koma í veg fyrir að aftur og aftur þurfi að útskrifa þessa einstaklinga úr meðferð eða af öðrum sjúkrastofnunum inn í vonlitlar félagslegar aðstæður með litla eða enga möguleika á langtíma bata frá sjúkdómi sínum.

SÁÁ hefur lagt mikla vinnu og hugvit í að greina þarfir þessa hóps og hvernig þeim verði best sinnt, en til þess að hægt sé að hefjast handa þarf fjármagn. Enn sem komið er hafa stjórnvöld haldið að sér höndum en þörfin fyrir þessi úrræði er slík að SÁÁ telur að ekki sé hægt að bíða lengur. Samtökin biðla því til almennings að leggja málefninu lið svo hægt sé að hefjast handa tafarlaust. Hægt er að hringja í söfnunarsímanúmer: 903-1001 fyrir 1000 króna stuðning, 903-1003 fyrir 3000 króna stuðning og 903-1005 fyrir 5000 króna stuðning.

Afmælis- og baráttufundur SÁÁ

Miðvikudaginn 8. október, kl. 20.00 hefst söfnunin formlega með Afmælis- og baráttufundi SÁÁ í Háskólabíói. Flutt verða erindi í tónum og tali en á meðal þeirra sem framkoma verða Bubbi, Björgvin Halldórsson, Sísý Ey, Agent Fresco og Karlakórinn Fóstbræður. Sérstakur gestur er Bjarni Benediktsson, fjármálaráðherra. Allir eru velkomnir og aðgangseyrir enginn.