Valmynd
english

Verðkönnun SÁÁ: Lægsta amfetamínverð síðan 2005

Allt frá ársbyrjun 2000 hefur SÁÁ gert mánaðarlegar kannanir á verðlagi á ólöglegum vímuefnum „á götunni.“ Allir innritaðir sjúklingar, sem hafa heilsu til, taka þátt í könnun þar sem spurt er hve margir þeirra hafa keypt slík efni síðastliðnar tvær vikur, og hvað greiddu þeir fyrir efnin. Meðaltalsverð er reiknað i tugum króna.

Verðkannanir SÁÁ hafa frá upphafi verið gerðar með þessum sama hætti og ættu því að gefa glögga mynd af verðbreytingum á ólöglegum vímuefnum „á götunni” á þessu rúmlega fjórtán ára tímabili.

Niðurstöður kannananna frá upphafi er hægt að lesa í pdf-skjali hér og að neðan. Skjalið hefur verið uppfært miðað við nýjustu upplýsingar því í september 2015.

Það sem vekur jafnan athygli er hve ólöglegi vímuefnamarkaðurinn virðist vera þróaður og stöðugur. Litlar sveiflur eru á verði og í raun virðist hægt að tala um að jafnvægi sé milli framboðs og eftirspurnar.

Í könnun síðasta mánaðar vekur það athygli að mikil verðlækkun virðist hafa orðið á amfetamíni og hefur verð þess ekki verið lægra í 10 ár, eða síðan sumarið 2005. Heimildarmenn SÁÁ telja skýringarinnar ekki síst að leita í því að það efni sem nú er til sölu sé á landi sé lélegt og standist illa samanburð við rítalín-lyf sem fáanleg eru á svörtum markaði hér á landi. Rítalín hefur frá hruni verið helsti vímugjafi fíkla sem nota örvandi efni.