Valmynd
english

„Við erum með massíva dagskrá“

Edrúhátíðin á Laugalandi í Holtum hefst í dag. Veitingatjaldið opnar klukkan 16 og dagskráin hefst með fjölskyldubingói í umsjón Þorsteins Guðmundssonar klukkan 19.30 í kvöld.

Hægt er að skoða dagskrána hér, á bls. 5 í SÁÁ blaðinu sem gefið er út í tilefni hátíðarinnar.

Verð fyrir alla helgina er 6.000 krónur en einnig eru seldir dagpassar á 2.500 krónur. Margir nýta sér dagpassa til þess að njóta einstaka dagskrárliða þótt þeir geti ekki dvalist alla helgina. Ókeypis er fyrir 14 ára og yngri.

Laugaland í Holtum er í 92 km fjarlægð frá Reykjavík, rétt vestan við Hellu. Það tekur um klukkutíma að aka á staðinn.

Fréttablaðið segir frá hátíðinni í dag og ræðir við Rúnar Frey Gíslason, framkvæmdastjóra hátíðarinnar. Viðtalið er birt hér á eftir:

„Þetta þýðir bara að þarna verður enginn þunnur og enginn á bömmer á leiðinni heim,“ segir Rúnar Freyr Gíslason sem skipuleggur Edrú-hátíðina á Laugalandi í Holtum. Er þetta í þriðja sinn sem hátíðin er haldin.

„Þetta er alltaf að verða stærra og stærra,“ segir Rúnar. „Við erum með massífa dagskrá yfir daginn fyrir börnin og síðan tónleikar um kvöldið.“

Það er sannkölluð tónlistarveisla um kvöldið en á meðal tónlistarmanna sem koma fram eru til dæmis KK og Maggi Eiríks, Benni Hemm Hemm og Sísí Ey með „acoustic“ sett. Dagskráin yfir alla hátíðina er heldur ekki af verri endanum. Má þar til dæmis nefna knúskeppni, graff-listasmiðju fyrir börn, ratleiki, söngkeppni barnanna og svo lengi mætti telja.

„Það eru margir sem halda að hátíðin sé bara fyrir alkóhólista og aðstandendur þeirra en þetta er alls ekki þannig,“ segir Rúnar. „Hátíðin er fyrir alla sem vilja koma og skemmta sér edrú yfir helgina.“

Það hlýtur að teljast erfitt að bóka hljómsveitir á hátíðir um verslunarmannahelgina en þegar vandamál koma upp þá er þeim reddað segir Rúnar.

„Trommarinn í Mammút er sem sagt að koma fram með Jóni Jónssyni í Eyjum á föstudagskvöldið,“ útskýrir Rúnar en trommarinn á einmitt að koma fram með Mammút kl. 23 á Edrú-hátíðinni sama kvöld.

Öryggi og alúðlegheit

„Þegar hann er búinn þá brunar hann niður á höfn og Atlantsflug flýgur með hann sérstaklega upp á land þar sem ég sæki hann og hendi honum beint upp á svið.“

Hátíðin kemur einnig til móts við þá sem treysta sér ekki að sofa í tjaldi og bjóða upp á dagpassa á 2.500 krónur.

„Þetta er bara klukkustund frá Reykjavík þannig að fólk getur alveg skotist yfir daginn,“ segir Rúnar en hátíðin hefst í dag. „Þetta er bara stemning og stuð í bland við öryggi og alúðlegheit.“