Lyklarnir fundnir og SÁÁ fær milljón!

lyklamynd2

Arnþór Jónsson og Þóra Björnsdóttir hjá SÁÁ taka við einni milljón króna úr hendi Benedikts Eyjólfssonar.

Farsæl lausn er fundin á lyklastuldarmálinu svokallaða sem verið hefur í fréttum undanfarna daga.

Forsagan er sú að þó nokkru magni bíllykla var stolið frá sölusvæði notaðra bíla hjá Bílabúð Benna, á Krókhálsi, í síðustu viku. Bílabúð Benna fór þá óvenjulegu leið að auglýsa eftir lyklunum á samfélagsmiðlum, þar sem milljón krónum var lofað hverjum þeim sem vísaði á lyklana eða kæmi þeim til skila. Þá var sá kostur gefinn að sá sem ætti hlut að máli gæti ákveðið að láta fundarlaunin renna til góðgerðamála. Svo fór að lokum að lyklarnir komu í leitirnar í gær og er ekki að orðlengja það að Benedikt fór rakleiðis til SÁÁ í morgun og afhenti forsvarsmönnum þeirra eina milljón krónur.

„SÁÁ hefur unnið gífurlega gott starf fyrir þjóðina í tugi ára og því miður fær maður reglulegar áminningar um mikilvægi þess starfs sem þau sinna,“ sagði Benedikt hjá Bílabúð Benna. „Með því að styrkja forvarnir og bæta heilbrigðisþjónustu getum við hjálpað þeim sem þurfa á stuðningi að halda.“

„Við viljum þakka lögreglunni sérstaklega fyrir fagleg og góð vinnubrögð í öllu málinu,“ sagði hann að lokum.