Gefa kost á sér til að að leiða SÁÁ áfram

Anna Hildur Guðmundsdóttir formaður SÁÁ hefur tilkynnt að hún gefi kost á sér til að halda áfram sem formaður samtakanna á næsta aðalfundi. Anna Hildur sendi póst þess efnis til aðalstjórnar í gærkvöldi og fylgdi því eftir með tölvupósti til félaga í SÁÁ. Þá hefur Þráinn Farestveit varaformaður samtakanna sömuleiðis tilkynnt að hann gefi kost á sér áfram.

Þau Anna Hildur og Þráinn voru kosin þann 14. febrúar síðastliðinn til að leiða starfsemi SÁÁ í framhaldi af umróti í stjórn samtakanna.

Á næsta aðalfundi SÁÁ verða kosnir 16 fulltrúar í 48 manna aðalstjórn samtakanna, svo og fulltrúar í stað þeirra sem hafa hætt. Aðalstjórn kýs síðan framkvæmdastjórn, formann og varaformann.

Í tölvupóstinum til SÁÁ félaga segir Anna Hildur meðal annars: „Mikil eindrægni hefur verið í framkvæmdastjórn samtakanna um starfsemina og þær hugmyndir um verkefni sem ráðast þarf í til að mæta nýjum og breyttum áherslum í takt við tímann. Ég hef einlægan áhuga á að fylgja þessum verkefnum eftir og gef því kost á mér til áframhaldandi setu sem formaður SÁÁ.“

Í póstinum kemur einnig fram að engar sumarlokanir verði í Von eða á Vík og má þakka það góðum árangri í fjáröflun undanfarin misseri. Einnig kemur fram að enn sé unnið að málalyktum vegna athugasemda Sjúkratrygginga við SÁÁ. „Deilan snýst ekki um peninga, heldur túlkun samninga og útfærslur meðferðarstarfsins í heimsfaraldrinum. Við höfum átt í viðræðum við Sjúkratryggingar um að landa þessu þannig að allir geti gengið sáttir frá borði. Þetta er flókið mál og ekki útséð hvenær klárast. En það liggur fyrir að þessi ágreiningur hefur ekki áhrif á það traust sem SÁÁ nýtur hjá stjórnvöldum,“ segir þar.

Í lokin bendir Anna Hildur á að markmið SÁÁ sé alltaf jafn skýrt – að halda áfram á þeirri braut að hjálpa alkóhólistum og fjölskyldum þeirra, byggt á bestu þekkingu hverju sinni.