Verðkönnun: 41% keypt lyfseðilsskyld lyf á svörtum markaði

Allt frá ársbyrjun 2000 hefur SÁÁ gert mánaðarlegar kannanir á verðlagi á ólöglegum vímuefnum „á götunni.“ Allir innritaðir sjúklingar á Sjúkrahúsinu Vogi, sem hafa heilsu til, taka þátt í könnun þar sem spurt er hve margir þeirra hafa keypt slík efni og hvað þeir greiddu fyrir efnin. Meðaltalsverð er síðan reiknað.

Niðurstöður frá upphafi er hægt að lesa í pdf-skjali hér og að neðan. Skjalið hefur verið uppfært miðað við nýjustu upplýsingar í nóvemberlok 2018.

Alls svöruðu 44 einstaklingar verðkönnun í lok nóvember 2018. Í ljós kom að 66% aðspurðra höfðu keypt ólögleg vímuefni/lyf, eða 29 einstaklingar. Meðalaldur þeirra var 32 ár en meðalaldur hinna sem ekki höfðu keypt slík efni var 53 ár.

Tæp 57% höfðu keypt örvandi vímuefni, eða 25 einstaklingar. Þar af höfðu flestir keypt kókaín (36%) og/eða amfetamín (32%). Rúm 45% keyptu kannabisefni, langflestir gras (41%). Átján einstklingar, 41% aðspurðra, höfðu keypt lyfseðilsskyld lyf á svörtum markaði. Sex einstaklingar keyptu ofskynjunarlyfið LSD og önnur lyf ganga kaupum og sölum, eins og Lyrica og Gabapentin. Fimmtungur aðspurðra hafði notað kannabisefni í rafsígarettur.

Í nóvember höfðu 18% aðspurðra sprautað vímuefnum í æð. Þessir einstaklingar höfðu allir fengið nálar og sprautur í apótekum. Fimm einstaklingar höfðu einnig fengið nálar og sprautur hjá vinum og neyslufélögum og 4 hjá frú Ragnheiði. Aðrir möguleikar voru Konukot, frá vinum og annars staðar. Flestir nefndu fleiri en einn stað.

 

Verdkonnun SAA November 2018