Verðkönnun: 72% keypt ólögleg vímuefni/lyf

Allt frá ársbyrjun 2000 hefur SÁÁ gert mánaðarlegar kannanir á verðlagi á ólöglegum vímuefnum „á götunni.“ Allir innritaðir sjúklingar á Sjúkrahúsinu Vogi, sem hafa heilsu til, taka þátt í könnun þar sem spurt er hve margir þeirra hafa keypt slík efni og hvað þeir greiddu fyrir efnin. Meðaltalsverð er síðan reiknað.

Niðurstöður frá upphafi er hægt að lesa í pdf-skjali hér og að neðan. Skjalið hefur verið uppfært miðað við nýjustu upplýsingar í apríllok 2018.

Alls svöruðu 43 einstaklingar verðkönnun í apríl 2018. Í ljós kom að 72% aðspurðra höfðu keypt ólögleg vímuefni/lyf, eða 31 einstaklingur. Meðalaldur þeirra var tæp 30 ár en meðalaldur hinna sem ekki höfðu keypt slík efni var 50 ár. Níu einstaklingar höfðu sprautað vímuefnum í æð, eða 21%.

Langflestir höfðu keypt örvandi vímuefni, eða 27 einstaklingar, þar af höfðu flestir keypt kókaín (22) og/eða amfetamín (18). 23 keyptu kannabisefni, flestir gras, 13 keyptu sterk verkjalyf í flokki ópíóíða og 17 einstaklingar keyptu benzódíazepín-lyf, eða róandi lyf, flestir Xanax (14). Sex einstaklingar keyptu ofskynjunarlyfið LSD og önnur lyf ganga kaupum og sölum, eins og Lyrica og Gabapentin. Rúm 23% aðspurðra höfðu notað kannabisefni í rafsígarettur.

https://saa.is/wp-content/uploads/2018/07/verdkonnun_SAA_april_2018.pdf