Verðkönnun: 52% keypt lyfseðilsskyld lyf

Allt frá ársbyrjun 2000 hefur SÁÁ gert mánaðarlegar kannanir á verðlagi á ólöglegum vímuefnum „á götunni.“ Allir innritaðir sjúklingar á Sjúkrahúsinu Vogi, sem hafa heilsu til, taka þátt í könnun þar sem spurt er hve margir þeirra hafa keypt slík efni og hvað þeir greiddu fyrir efnin. Meðaltalsverð er síðan reiknað.

Niðurstöður frá upphafi er hægt að lesa í pdf-skjali hér og að neðan. Skjalið hefur verið uppfært miðað við nýjustu upplýsingar í júnílok 2018.

Alls svaraði 91 einstaklingur verðkönnun í lok maí og júní 2018. Í ljós kom að 65% aðspurðra höfðu keypt ólögleg vímuefni/lyf, eða 59 einstaklingar. Meðalaldur þeirra var rúm 32 ár en meðalaldur hinna sem ekki höfðu keypt slík efni var 48 ár.

Um helmingur hafði keypt örvandi vímuefni, eða 43 einstaklingar, þar af höfðu flestir keypt amfetamín (29) og/eða kókaín (25). Svipaður fjöldi, eða 38 manns, keyptu kannabisefni, langflestir gras (34). Rúmlega helmingur aðspurðra, eða 47 einstaklingar höfðu keypt lyfseðilskyld lyf, 24 keyptu sterk verkjalyf í flokki ópíóíða og 23 einstaklingar keyptu benzódíazepín-lyf, eða róandi lyf, flestir Xanax (18). Fjórir einstaklingar keyptu ofskynjunarlyfið LSD og önnur lyf ganga kaupum og sölum, eins og Lyrica og Gabapentin. Rúm 13% aðspurðra höfðu notað kannabisefni í rafsígarettur.

Athygli vekur að verðið á sterkum verkjalyfjum hefur lækkað undanfarna mánuði, t.d. kostaði 80 mg tafla af OxyContin 8.000 kr. í janúar en kostar 6.500 kr. í júní.

Í maí og júní höfðu 20% aðspurðra sprautað vímuefnum í æð, eða 18 manns. Þessir einstaklingar höfðu allir fengið nálar og sprautur í apótekum (100%) en 4 einstaklingar fengu oftast nálar og sprautur hjá frú Ragnheiði (22%). Aðrir möguleikar voru Konukot, frá vinum og annars staðar. Flestir nefndu fleiri en einn stað.

https://saa.is/wp-content/uploads/2018/07/Verdkonnun_SAA_juni_2018.pdf