Verðkönnun: Um helmingur þeirra sem keyptu kannabisefni notuðu kannabisefni í rafrettur

Allt frá ársbyrjun 2000 hefur SÁÁ gert mánaðarlegar kannanir á verðlagi á ólöglegum vímuefnum „á götunni.“ Allir innritaðir sjúklingar á sjúkrahúsinu Vogi, sem hafa heilsu til, taka þátt í könnun þar sem spurt er hve margir þeirra hafa keypt slík efni og hvað þeir greiddu fyrir efnin. Meðaltalsverð er síðan reiknað.

Niðurstöður frá upphafi er hægt að lesa í pdf-skjali hér og að neðan. Skjalið hefur verið uppfært miðað við nýjustu upplýsingar í febrúarlok 2019.

Alls svöruðu samtals 124 einstaklingar verðkönnun á þriggja mánaða tímabili, frá des. 2018-feb. 2019. Í ljós kom að 66% aðspurðra höfðu keypt ólögleg vímuefni/lyf, eða 82 einstaklingar. Meðalaldur þeirra var 31 ár en meðalaldur hinna sem ekki höfðu keypt slík efni var 48 ár.

Rúm 53% höfðu keypt örvandi vímuefni, eða 66 einstaklingar. Flestir keyptu kókaín (40%) og/eða amfetamín (38%). Tæp 39% keyptu kannabisefni, langflestir gras (38%). Alls sögðust 48 einstaklingar, eða 39% aðspurðra, hafa keypt lyfseðilsskyld lyf á svörtum markaði. Sex einstaklingar keyptu ofskynjunarlyfið LSD og önnur lyf ganga kaupum og sölum, eins og Lyrica og Gabapentin. Um 44% þeirra sem höfðu keypt kannabisefni höfðu einnig notað kannabisefni í rafrettur (17%).

Á þessu þriggja mánaða tímabili höfðu 26% aðspurðra sprautað vímuefnum í æð. Þessir einstaklingar höfðu flestir fengið nálar og sprautur í apótekum. Aðrir möguleikar voru Frú Ragnheiður, Konukot, frá vinum og annars staðar. Flestir nefndu fleiri en einn stað.

Verdkonnun SAA Februar 2019