Vogur
Á Sjúkrahúsinu Vogi fá sjúklingar afeitrun og greiningu. Læknir leggur mat á meðferðarþörf. Flestir eru undir áhrifum vímuefna eða í fráhvörfum við komu.
Sjúkdómur sem hægt er að meðhöndla
Á sjúkrahúsinu Vogi er lögð áhersla á fíknsjúkdóm sem margþátta sjúkdóm sem hægt er að meðhöndla. Meðferðin er byggð á læknisfræðilegum greiningum, afeitrun með fagfólki, lyfjameðferð og einstaklingshæfðri sálfélagslegri meðferð. Meðferðin grípur inn í fylgikvilla, þ.e. líkamlega, geðræna og félagslega.
Skimað er fyrir smitsjúkdómum, notuð er sérhæfð viðtalstækni fyrir mismunandi þarfir og einnig er dagleg fræðsla og hópmeðferðir sem eru kynja- og aldursskiptar.
Afeitrun og greining
Flestir eru undir áhrifum vímuefna eða í fráhvörfum við komu. Fráhvarfsmeðferð er veitt af læknum og hjúkrunarfræðingum.
Á sérstökum sjúkragangi, Gátinni, á Vogi eru 11 sjúkrarúm fyrir veikustu sjúklingana. Heilbrigðisstarfsfólk er til staðar allan sólarhringinn. Læknir er á vakt á sjúkrahúsinu alla daga vikunnar og á bakvakt kvöld og nætur.
Lögð er áhersla á eftirfylgni og fjölbreytt úrræði til reiðu. Mismunandi hópar fá mismunandi úrræði.
Sálfélagsleg meðferð
Sálfélagsleg meðferð hefst samhliða fráhvarfsmeðferð og miðar að bata án vímuefna. Sálfélagslega meðferðin er fólgin í fræðslu um fíknsjúkdóminn, hópmeðferð til að styðja við innsæi, og sérsniðnum verkefnum sem treysta grunninn að breyttum lífsstíl. Áhugahvetjandi samtalið styður sjúklinga til að ná meðferðarmarkmiðum sínum.
Að baki meðferðinni standa áfengis- og vímuefnaráðgjafar sem meta meðferðarþörf og aðstæður hvers og eins í viðtölum og stýra hópmeðferð, sálfræðingar sem meta sálfræðilega stöðu og leggja til leiðir til bata, læknar sem meta lyfjaþörf vegna fráhvarfa og annarra líkamlegra jafnt sem geðrænna kvilla, og hjúkrunarfræðingar og sjúkraliðar sem veita öllum aðhlynningu eftir þörfum.
Einstaklingshæfð meðferðaráætlun
Einstaklingshæfð meðferðaráætlun er gerð í samvinnu við sjúklinginn þar sem tekið er tillit til kyns, aldurs, félagslegra, líkamlegra og sálfræðilegra þarfa. Sálfélagslega meðferðin er kynjaskipt til að skapa öryggi og næði til að ræða viðkvæm mál og styrkja félagsleg tengsl meðal kvenna/karla.
Allir meðferðarhópar eru kynjaskiptir, einnig svefngangar á neðri hæð þar sem konur eru á sérstökum gangi. Sameiginleg rými í fyrirlestrasal og í matsal eru kynjaskipt.
Gangur meðferðar
Fylgst er náið með framförum hvers og eins, hjúkrun er mikil í upphafi til að greina og meta fráhvarfsmeðferð og heilsu, læknar tala við sjúklinga daglega, og um leið og sjúklingur hefur getu til tekur hann þátt í sálfélagslegu meðferðinni.
Meðaldvöl er 10 dagar, og má reikna með því að hver sjúklingur hafi þá sótt um 29 fræðsluerindi, stundað 8 hópmeðferðir og unnið sérverkefni, og fengið a.m.k. 8 einstaklingsviðtöl til undirbúnings fyrir næstu skref í endurhæfingu og virkni í lífi og starfi.
Hvernig geri ég beiðni um innlögn á Sjúkrahúsið Vog?
Hringir í síma 530-7600, skrifstofan á Vogi er opin virka daga kl.08:00-12:00 og kl.13:00-16:00.
Hverjir aðrir geta gert beiðni um innlögn?
Heimilislæknir/læknir/félagsráðgjafi/barnavernd o.fl. geta sent tilvísun eða haft samband og þá er gerð beiðni um innlögn. Einnig getur fjölskylda/aðstandendur hringt og gert beiðni um innlögn.
Hvað get ég gert ef ég á nú þegar beiðni um innlögn?
Ef þú bíður innlagnar eða óskar eftir annarri aðstoð, er hægt að leita á göngudeildir SÁÁ í Reykjavík og á Akureyri í síma 530-7600. Þar er hægt að panta viðtal á staðnum eða í fjarþjónustu. Einnig eru meðferðarúrræði í göngudeildum sem geta komið í stað innlagnar á Sjúkrahúsið Vog.
Hvað getur biðtíminn verið langur eftir innlögn á Sjúkrahúsið Vog?
Biðtími eftir innlögn er að meðaltali 2-4 mánuðir fyrir einstaklinga sem eru að koma í 2. skiptið eða oftar í meðferð. Biðtími fyrir einstaklinga sem eru að koma í fyrstu meðferð eða langt er liðið frá síðustu meðferð (9-10 ár) er að meðaltali 2-4 vikur.
Hvað er innlögn á Sjúkrahúsinu Vogi löng og hvað tekur við?
Innlögn á Vogi er um 10 dagar og inniliggjandi meðferð á Vík er 28 dagar, einnig eru mislöng meðferðarúrræði í göngudeildum SÁÁ í Reykjavík og á Akureyri.
Hvert get ég leitað annað vegna vanda af fíknsjúkdómi?
Aðstoð vegna vanda af fíknsjúkdómi er að finna hjá heilsugæslunni, hjá velferðarsviði sveitarfélaga (félagsráðgjafar), einnig er fíknimeðferð á fíknigeðdeild Landspítalans og á bráðamóttöku geðdeildar, sími 543-1000.
